FONTE: LA VOZ DE GALICIA

A nova sanidade de Vigo ten forma de barco. Seis velas brancas perfilan o novo hospital de Beade, deseñado polo equipo dos arquitectos franceses Jean Pistre e Denis Valode. Pistre (Niza, 1951) explica por correo electrónico os detalles do proxecto, que consensuaron cos propios médicos.

-Estamos condeados a que os hospitais sexan lugares grises, pouco acolledores?

-Adoita preguntarse aos arquitectos se vivirían nas vivendas que proxectan. Sen falsas posturas, se se nos pedise ser ingresados nos hospitais que pensamos, responderiamos afirmativamente, porque a nosa reflexión neste campo durante anos centrouse no individuo.

-Dise que este hospital vai ser o máis grande de Europa. De verdade pódese construír un hospital destas dimensións en só tres anos?

-Si, tecnicamente o desafío é posible, e non vemos inconvenientes para manter os prazos de execución previstos. Por parte do Sergas existe unha firme vontade de finalizar en prazo o proceso comezado fai xa dous anos, xa que se trata de dar resposta ás necesidades dos habitantes de Vigo en materia sanitaria, e esta é unha cuestión que non admite atrasos. Unha execución en prazo garante que os equipamentos previstos sexan os máis actuais. É obrigación moral do arquitecto o realizar un esforzo.

-Pero construír un hospital non é como un edificio residencial, é unha obra moito máis complexa…

-O hospital é un tema particularmente difícil e que require certos coñecementos. É unha máquina complexa, onde cada engrenaxe, cada elo, conta. A nosa experiencia no mundo da industria, a partir do noso proxecto para a planta de L’Oréal, afíxonos a ler e entender estas cadeas de produtividade e excelencia: preferimos a eficacia á imaxe, a realidade á metáfora, seguindo moi de cerca as preocupacións dos profesionais sanitarios.

-E os accesos?

-O proxecto está ligado ao proxecto sectorial de incidencia supramunicipal. Estamos convencidos de que se garanten uns bos accesos.

-Por que as velas?

-Vigo é unha cidade que mira cara ao mar. Como estranxeiro, creo que Vigo ha de aspirar potenciar a súa propia identidade a nivel urbano. Neste sentido, desde un principio pensamos nas velas dos barcos como elemento representativo de Vigo, que non só fose referencia para os propios vigueses, senón que supuxese tamén un símbolo a trasladar ao exterior. O hospital será único, polos seus espazos, polos seus materiais, e pola súa luz, que será a de Vigo.

-Un ten a sensación de que cando entra nun hospital sempre acaba perdéndose, que tarda horas en atopar as habitacións ou a consulta do médico…

-diversificamos os accesos para cada servizo, consultas, hospitalización, urxencias e rehabilitación, de maneira que unha vez que se entra no edificio os percorridos son curtos e claros. Recorremos a diferentes cores para facilitar a orientación.

-Como consensuaron o proxecto cos profesionais?

-É fundamental un intercambio de impresións co persoal que vai desempeñar aí o seu traballo. O Sergas facilitou reunións semanais cos equipos médicos ao longo de todo o proceso de debuxo.

-Que pediron os médicos?

-Ademais das reunións que se mantiñan semanalmente cos diferentes equipos médicos, sabemos que, no seu propio tempo libre, víanse para discutir as nosas propostas. Ata levaban os planos aos seus lugares de traballo e expúñanos nas paredes para permitir que todos tivesen unha visión xeral. foi unha gran responsabilidade reunir no proxecto o esforzo realizado por todas estas persoas.

---